Fjárfestar frá Abu Dhabi kaupa Manchester City

Fjárfestar frá Sameinuðu Arabísku Furstadæmunum hafa keypt enska knattspyrnufélagið Manchester City af Tælendingnum Thaksin Shinawatra.

Fregnir herma að yfirtakan hafi átt sér stað seint í gærkvöldi og ætla nýju eigendurnir að koma félaginu á toppinn á Englandi sem fyrst ef marka má yfirlýsingu þeirra í dag.

Fjárfestarnir sem keyptu félagið kalla sig Abu Dhabi United Group for Development and Investment og kemur það í hlut Sulaiman Al Fahim að verða stjórnarformaður félagsins.

"Takmark okkar er einfalt - við viljum gera Manchester City að stærsta félagi í ensku úrvalsdeildinni og stefnan verður sett á að koma því hóp fjögurra efstu liðanna á þessari leiktíð," sagði í tilkynningu frá stjórnarformanninum.

Thaksin Shinawatra tók yfir City fyrir aðeins ári síðan, en framtíð hans hjá félaginu þótti nokkuð óljós þar sem eignir hans hafa verið frystar í heimalandi hans þar sem hann bíður þess að mæta fyrir rétt vegna meintra lögbrota.