Bubbi er lúði

„Ég er lúði," segir Bubbi Morthens, sem fagnar afmæli og nýútkominni plötu með tónleikum í Borgarleikhúsinu í kvöld. Sviðsmyndin er nokkuð óvenjuleg, en þrjú hjólhýsi verða á sviðinu.

„Þetta er bara sviðsmynd. Sumir eru með myndir, blöðrur eða loftskip. Ég er með hjólhýsi frá 1973 frá Seglagerðinni. Það er ekkert lúðalegra en að vera í hjólhýsi," segir Bubbi, sem segir sviðsmyndina hæfa stemningunni á tónleikunum vel. „Þetta er svona lúðaleg stemning." Hann þvertekur þó fyrir að tónlistin á nýju plötunni sinni, Fjórum nöglum, sé nokkuð lúðaleg. „Þetta er ofursvöl tónlist," segir Bubbi, og bætir við að það sé þó nokkur Tarantino „fílingur" á plötunni.

Aðspurður hvort lúðar séu nýtt áhugamál segir Bubbi svo ekki vera, þetta sé lífsstíll - og hann innifeli fleira en hjólhýsi. „Hinn fullkomni lúði hann gengur um í hlýrabol," segir Bubbi, sem hefur reyndar sést í ófáum slíkum um ævina. Lýsing Bubba á lúða er orðin skuggalega lík hugmyndum manna um hvítan hjólhýsaskríl í Bandaríkjunum. Hann hefur þó sínar skýringar á uppruna og þróun tegundarinnar. „Ég held að lúðinn hafi upprunalega komið frá Balkanskaganum, og þaðan komist til Vestur-Evrópu og þaðan til Bandaríkjanna. Þar hefur hann dafnað og þroskast í skjóli einangrunar, og þar hefur sérstaklega harðgerður lúðastofn orðið til sem er að finna í Suðurríkjunum."

Eins og alþjóð líklega veit er Bubbi að fara giftast unnustu sinni, Hrafnhildi Hafsteinsdóttur á morgun. Hann þvertekur fyrir að það sé mikið álag að halda stórtónleika á föstudegi og brúðkaup daginn eftir. „Það er ekki stressandi að vera lifandi. Þetta eru bæði kærkomin verkefni og gleðileg."