Vörubílstjórar loka Suðurlandsvegi - sérsveit á staðnum

Vöruflutninga- og sendibílstjórar virðast ekki af baki dottnir því þeir hafa nú lokað Suðurlandsvegi nærri Rauðavatni.

Vísir náði tali af Sturlu Jónssyni, talsmanni bílstjóranna, sem sagðist vera í kaffi á Olísstöðinni við Rauðavatn. Aðspurður sagði hann nokkra bílstjóra hafa stungið upp á aðgerðunum og nú séu um þrjátíu bílar á staðnum. Hann sagðist ekki vita hversu lengi bílstjórarnir yrðu á staðnum en það kæmi í ljós.

Þær upplýsingar fengust hjá lögreglunni á höfuðborgarsvæðinu að nokkrir lögreglumenn væru komnir á vettvang og lögregla væri nú að ráða ráðum sínum. Sjónarvottar segja einn af bílum sérsveitarinnar á staðnum en að lögregla hafi ekki gripið til aðgerða.

Bílstjórarnir létu síðast til skarar skríða í gær nærri Bessastöðum á sama tíma og Mahmound Abbas, forseti Palestínu, var þar að snæða hádegisverð. Þar var mikill hiti í mönnum en sættir urðu þó við lögreglu að lokum.