Bakslag í viðræður um Suðurnesjalínu

Álver í Helguvík og netþjónabú á Keflavíkurflugvelli eru bæði háð því að Suðurnes verði tengd raforkukerfi landsins með nýrri háspennulínu en einnig telur Landsnet, sem annast raforkuflutninginn, að nýja línu þurfi til að treysta rekstraröryggi fyrir íbúa svæðisins. Viðræður milli Landsnets og Suðurlinda, sem kemur fram fyrir hönd þriggja sveitarfélaga, Voga, Grindavíkur og Hafnarfjarðar, ganga afar hægt og hefur ekkert verið fundað í heilan mánuð. Ágreiningurinn snýst aðallega um hvort leggja eigi línuna í jörð, eins og sveitarfélögin vilja. Ólafur Örn Ólafsson, bæjarstjóri í Grindavík og stjórnarformaður Suðurlinda, segir bakslag hafa komið í viðræðurnar. Hugmyndir sveitarfélaganna um jarðstrengi hafi ekki fengið þann hljómgrunn sem þau höfðu vonast eftir.

Guðmundur Ingi Ásmundsson, aðstoðarfórstjóri Landsnets, viðurkennir að orðið sé mjög brýnt að fá niðurstöðu.

Norðurál áformar að hefja álframleiðslu í Helguvík eftir tvö og hálft ár. Sú tímasetning er hins vegar í uppnámi því áætlað er að tvö ár taki að leggja nýja raflínu og það verk gefur ekki hafist fyrr en línan er komin í gegnum umhverfismats- og skipulagsferli, sem tekur minnst hálft ár.