Enginn árangur og allt stopp hjá ríkisstjórninni

Enginn árangur, allt stopp eru orðin sem stjórn Framsóknarfélags Reykjavíkur notar um ríkisstjórnina á eins árs afmæli hennar.

Í ályktun sem samþykkt var á stjórnarfundi kemur fram að ríkisstjórnin hafi náð nýjum hæðum í sýndarmennsku fyrir helgina þegar hún fagnaði eigin eins árs afmæli með því að bjóða leikskólabörnum í veislu. „Almenningi var ekki boðið í veisluna. Það er von, þar sem lífskjör hafa farið hratt versnandi í tíð núverandi ríkisstjórnar eftir langt samfellt hagvaxtarskeið á meðan Framsóknarflokkurinn sat í ríkisstjórn. Forsvarmönnum atvinnulífsins var ekki heldur boðið í veisluna, enda hefðu þeir sjálfsagt viljað ræða Evrópumálin sem forsætisráðherra keppist við að lýsa ekki á dagskrá.

Fasteignakaupendur og seljendur tóku heldur ekki þátt í afmælisfagnaðinum, enda varla um fasteignamarkað að ræða á Íslandi lengur. Sjálfsagt hefðu einhverjir úr þeirra hópi viljað fá svör um framtíð Íbúðarlánasjóðs, sem Framsóknarmenn eru ekki lengur í stöðu til að verja, og hvað líði boðuðu afnámi stimpilgjalda," segir meðal annars ályktun Framsóknarfélags Reykjavíkur.

Þá er bent á að íslenskur landbúnaður, stjórnendur menntamála, heilbrigðiskerfisins, landeigendur, sveitarstjórnarmenn og fulltrúar orkufyrirtækja og stóriðju hafi ekki verið í veislunni enda fullvíst að einhverjir úr þeim hópi hefðu tekið upp á því að spyrja óþægilegra spurninga.

„Verkum þessarar ríkisstjórnar, sem henni finnst tilefni til að fagna sérstaklega í eigin afmælisveislu, verður best lýst með að snúa örlítið út úr slagorði okkar Framsóknarmanna frá síðustu kosningum, það er: Enginn árangur, allt stopp," segir í tilkynningunni.