Englendingar lögðu Þjóðverja í Berlín

Enska landsliðið í knattspyrnu fagnaði í kvöld sjaldgæfum útisigri á Þjóðverjum þegar liðið hafði betur 2-1 í æfingaleik liðanna í Berlín.

Það var fyrirliðinn John Terry sem tryggði enska liðinu sigurinn með skallamarki í lokin, en hann bætti þar með fyrir misskilning sem varð milli hans og Scott Carson markvarðar sem hafði fært Þjóðverjunum jöfnunarmark á silfurfati.

Varamaðurinn Patrick Helmes nýtti sér mistök þeirra Terry og Carson, en fyrsta mark leiksins kom frá varnarmanninum Matthew Upson í fyrri hálfleik.

Þetta var fimmti sigur Fabio Capello með enska landsliðið, sem í kvöld var mikið til skipað leikmönnum sem hafa verið fyrir utan byrjunarliðið undanfarin misseri.

Þetta var reyndar annar sigur enska landsliðsins í Þýskalandi í röð, því síðast þegar liðin mættust vann England 5-1 í sögufrægum leik. Sá leikur var reyndar ekki spilaður í Berlín eins og leikurinn í kvöld, en tap Þjóðverja á þjóðarleikvangnum í kvöld var það fyrsta síðan árið 1973.

Diego Maradona fagnaði sigri í sínum fyrsta leik sem landsliðsþjálfari Argentínu þegar lærisveinar hans skelltu skotum 1-0 á Hampden Park. Það var Maxi Rodriguez sem tryggði gestunum sigurinn með marki snemma leiks.

Craig Bellamy skoraði sigurmark Walesverja sem unnu góðan útisigur á Dönum 1-0 á Parken fyrir framan 10,000 áhorfendur. Markið kom á 77. mínútu og endurtók Bellamy leikinn frá því fyrir tíu árum þegar hann tryggði Wales einmitt óvæntan sigur á Dönum á þessum velli.

Hollendingar unnu Svía 3-1 þar sem Robin Van Persie (2) og Dirk Kuyt skoruðu mörk Hollendinga en Kim Kallström skoraði mark Svía.

Pólverjar lögðu Íra 3-2 á útivelli, Úkraínumenn lögðu Norðmenn 1-0 og Ítalir og Grikkir gerðu 1-1 jafntefli.

Þá var einn leikur í undankeppni HM. Tékkar unnu 3-0 sigur á San Marínó á útivelli.