Utanríkisráðherra hjólar á ríkisstjórnarfundi

Ökumenn sem voru á leið til vinnu í morgun fengu margir hverjir samviskubit þegar Ingibjörg Sólrún Gísladóttir utanríkisráðherra kom hjólandi á fullri ferð eftir Kaplaskjólsvegi með hjálm á hausnum. Ráðherrann er í einu af fimm keppnisliðum ráðuneytisins í átakinu, Hjólað í vinnuna.

„Ég get staðfest það að undanfarna daga hefur hún hjólað á ríkisstjórnarfundi og upp í ráðuneyti enda er hún í einu af keppnisliðum ráðuneytisins í þessu frábæra átaki," segir Kristrún Heimisdóttir aðstoðarkona Ingibjargar Sólrúnar.

Kristrún segir Hjörleif Sveinbjörnsson eiginmann Ingibjargar vera mikinn hjólreiðamann og því eigi hún ekki langt að sækja hjólreiðamennskuna.

„Ég geti einnig staðfest að hún hefur gríðarlegt úthald. Ég á að baki 154 leiki fyrir KR í efstu deild í knattspyrnu og hún er 17 árum eldri en ég. Engu að síður er ég alltaf á hlaupum á eftir henni," segir Kristrún sem hefur aldrei kynnst öðru eins úthaldi.

Aðspurð hvort bílstjóri Ingibjargar hafi af þessum sökum verið í fríi undafarna daga segir Kristrún:

„Hann sinnir náttúrulega öðrum verkefnum líka og keyrir hana ýmislegt yfir daginn. En hvort hann hafi verið að keyra eitthvað minna undanfarið veit ég ekki."

Þrátt fyrir þennan mikla áhuga starfsmanna ráðuneytisins hefur Kristrún ekki enn sest upp á hnakkinn.

„Nei því miður þá hef ég ekki gert það. Ég verð að viðurkenna að ráðherrann tekur mér fram í þessu."