Grímur Atlason gefur út plötu

Bæjarstjóri Íslands og þroskaþjálfinn Grímur Atlason og þúsundþjalalæknirinn Lýður Árnason eru forsprakkarnir í hljómsveitinni Grjóthrun í Hólshreppi, sem nú sendir frá sér sína fyrstu plötu.

Platan kemur út 30. maí og er gefin út í samstarfi við útgáfu- og dreifingarfyrirtækið Kimi records. Bæjarstjórnarmaðurinn úr Vogunum Jón Elíason slær gígjuna að ógleymdum Húsvíkingnum og rotþrónni Haraldi Ringsted sem slær bumbur og heldur þessu öllu saman.

Hér er að finna kröftugt kassagítarrokk með alvöru ádeilutextum á íslenskt samfélag. Landsbyggðarhnefanum er dúndrað í borðið og málefni líðandi stundar krufin og mulin niður í öreindir; kvótakerfið, fólksflutningar, auðsöfnun og framtíðarhorfurnar.

Þessi fyrsta plata sameinar vestfirska og norðlenska krafta og hér er um að ræða landsbyggðarpródjekt par excellance, fárbautastein sem leggur línurnar fyrir sjálfstæðisbaráttu vestfirzkra um ókomna framtíð.