Ætla að sniðganga Ísland vegna hvalveiða

Nú gengur tölvupóstur manna á milli þar sem farið fram á að íslendingar hætti hvalveiðum í vísindaskyni. Sá sem sendir póstinn segist ætla að gera allt sem í hans valdi stendur til þess að sniðganga Ísland og láta alla vita af því.

Í bréfinu kemur fram að Doris Doppler sem skrifar bréfið ætli nú að ganga í evrópsk samtök sem hafi það að markmiði að sniðganga Ísland vegna stefnu þeirra í hvalveiðimálum. Skilaboðin eru skýr en þau eru að stjórnvöld láti af hvalveiðum í vísindaskyni hið snarasta.

„Þar til íslendingar láta af hvalveiðum mun ég ekki kaupa neinar vörur frá Íslandi, ég mun ekki fara þangað í frí eða heimsækja landið af einhverri annarri ástæðu. Ég mun upplýsa allar alþjóðlegar ferðaskrifstofur, hótel og aðila sem koma að ferðaþjónustu á Íslandi um þessa afstðu okkar og ég mun ekki leggja inn peninga í íslenska banka á meðan þessu stendur," segir í bréfinu.

„Ég mun einnig sniðganga hvert það fyrirtæki sem er í viðskiptum við Ísland eða vinna með íslendingum. Ég mun einnig upplýsa þessi fyrirtæki um málið. Einnig mun ég fara fram á það við evrópusambandið að íslendingar fái ekki inngöngu fyrr en þeir hætta þessum veiðum. Ég mun einnig upplýsa alla vini mina og fjölmiðla um þessi áform okkar og ég er viss um að þeir muni fylgja mér."

Síðan heldur Doris áfram að segja frá þessum áformum sínum en bréfið er á ensku og þýsku. Það barst aðila tengdum ferðaþjónustu tvisvar nú í kvöld.