,,Ótrúlegt að það skuli vera fólk á lífi"

Rögnvaldur Hólmar Jónsson, flugvirki sem starfar sem verktaki fyrir Icelandair, var á flugvellinum í Madríd þegar flugvél Spainair brotlenti þar í dag.

,,Miðað við þennan mikla reyk þá er ótrúlegt að það skuli vera fólk á lífi," segir Rögnvaldur sem var fyrst var við að flugvél þegar hefði brotlent þegar hann sá ,,gríðarlega mikinn reykstrók sem fór bara stækkandi."

Tölur um fjölda látinna eftir flugslysið hafa verið á reiki, allt frá 45 manns til 150 manns. Alls voru 166 manns í vélinni samkvæmt SAS, móðurfélagi Spainair. Vélin var á leiðinni til Las Palmas á Kanarí. Rögnvaldur segir að spænskir fjölmiðlar segi að 175 hafi verið í vélinni og að minnsta kosti 25 hafi komist lífs af.

,,Það sem er óhugnalegt er að það voru einhver vandamál með vélina áður en hún tók á loft," segir Rögnvaldur. Fyrst eftir að vélin fór út á flugbrautina kom hún aftur inn og var skoðuð. ,,Ég hefði ekki viljað verið sá flugvirki sem skrifaði hana út."