Eiginkona Guðmundar tapaði hálfri milljón á meiðyrðamáli

Helga Haraldsdóttir, eiginkona Guðmundar Jónssonar fyrrverandi forstöðumanns Byrgisins, tapaði hálfri milljón á meiðyrðamáli sem hún höfðaði gegn Erlu Hlynsdóttur, blaðamanni á DV, og tveimur viðmælendum hennar, þeim Ólöfu Ósk Erlendsdóttur og Magnúsi Einarssyni. Helga fór fram á að þrjár milljónir í skaðabætur og að 14 ummæli yrðu dæmd ómerk.

Upphaf þessa máls er viðtal sem birtist í DV í fyrra undir fyrirsögninni Árásir Satans. Í viðtalinu sem blaðamaður DV tekur við þau Ólöfu Ósk, fyrrverandi vistmann í Byrginu, og Magnús, fyrrverandi starfsmann þess, er meðal annars fjallað um meinta þátttöku Helgu í kynlífsathöfnum Guðmundar og tiltekinna skjólstæðinga Byrgisins. Í greininni er látið að því liggja að Helga hafi lagt stund á að „veiða" ungar stúlkur fyrir Guðmund.

Héraðsdómur Reykjavíkur dæmdi ein ummælanna sem birtust í DV ómerk og var Erla dæmd til að greiða Helgu 100.000 krónur í miskabætur vegna þeirra.

Þá var Helgu gert að greiða Ólöfu Ósk og Magnúsi 300.000 krónur hvoru um sig í málskostnað. Samtals 600.000 krónur.