Mestar hækkanir í Hagkaupum og Nóatúni

Verðlagseftirlit ASÍ birtir nú breytingar á verði innkaupakörfu heimilisins í stærstu matvöruverslunarkeðjunum 7. vikuna í röð. Í könnuninni kemur fram að mest hækkun á vörukörfu ASÍ milli vikna að þessu sinni hafi verið í stórmörkuðunum Hagkaupum og Nóatúni.

Í Hagkaupum hækkaði verð körfunnar um 2,1% á milli 3. og 4. viku í maí segur ASÍ að það megi rekja þá hækkun að mestu til hækkana á verði kjötvara og grænmetis og ávaxta í vörukörfunni.

Í Nóatúni hækkaði verð innkaupakörfunnar um 1,9% á milli vikna og valda hækkanir á verði grænmetis og ávaxta þar mestum breytingum að því er fram kemur hjá ASÍ. „en einnig hækkun á kjöt- og mjólkurvörum. Í Samkaupum-Úrval sem einnig er í flokki stórmarkaða var verð vörukörfunnar nánast óbreytt á milli vikna."

„Í lágvöruverðsverslunum hækkaði verðið á vörukörfu ASÍ mest í Kaskó, um 1,3%, á milli mælinga í 3. og 4. viku maímánaðar," segir ennfremur. „Mest áhrif til hækkunar hefur verðhækkun á brauði og kornvörum, mjólkuvörum og á liðnum ýmsar matvörur í vörukörfunni. Í Krónunni breyttist verð körfunnar lítið á milli vikna eða um 0,3% og í Nettó var verðið óbreytt á milli mælinga. Verð innkaupakörfunnar lækkaði hins vegar í Bónus um 0,7% á milli vikna sem má að mestu leyti rekja til lækkunar á verði kjötvara í körfunni."

Þá segir að í klukkubúðunum svokölluðu hafi vörukarfan hækkað mest í verslunum 10-11 um 1,1% á milli vikna „og veldur hækkun á verði kjötvara þar mestum breytingum en einnig hefur verðhækkun á drykkjarvörum í körfunni nokkur áhrif. Í 11-11 er verð vörukörfunnar nánast óbreytt á milli vikna en í Samkaupum-Strax lækkar verðið hins vegar um 1,7% sem að langstærstum hluta stafar af lækkun á kjötvörum í innkaupakörfunni."

Nánar má kynna sér efni könnunarinnar hér.