Óttast að foreldrar eigi ekki fyrir skólamáltíðum

Guðmundur Sighvatsson skólastjóri Austurbæjarskóla vill að stjórnvöld taki ákvörðun um að hætta gjaldtöku fyrir heitan mat í skólum. Óttast er að æ fleiri foreldrar geti ekki greitt fyrir skólamáltíðir barna sinna.

Íslendingar leggja nú eyrun við raunasögur úr kreppunni sem reið yfir Finnland á árunum 1990 til 1994. Atvinnulausir áttu ekki málingi matar og eina heita máltíðin sem mörg finnsk börn fengu yfir daginn var máltíðin í skólamötuneytinu.

Íslenskir foreldrar greiða um 6000 krónur á mánuði fyrir skólamáltíðir. Fyrir barnmargar fjölskyldur getur þetta orðið þó nokkur upphæð.

Í Austurbæjarskóla verður haft samband við þá foreldra sem hugsanlega eiga í erfiðleikum við að greiða fyrir máltíðir barna sinna.Ekki kemur til greina að börnum verði synjað um heitan mat. Austurbæjarskóli er þó aðeins einn af um 190 grunnskólum landsins og enn hefur engin ákvörðun verið tekin um samhæfðar aðgerðir.