Ferguson: Neville er ótrúlegur

Sir Alex Ferguson, stjóri Manchester United, segist gáttaður á vel heppnaðri endurkomu bakvarðarins Gary Neville inn í liðið eftir 16 mánaða fjarveru vegna meiðsla.

Neville spilaði 60 mínútur í leik United gegn Kaizer Chiefs í Suður-Afríku í gær og uppskar hrós knattspyrnustjórans fyrir frammistöðuna.

"Það var frábært að sjá til Gary og sjá hversu vel honum tókst til á vellinum. Hann er ótrúlegur. Hver sem leikið hefur knattspyrnu veit að það er ekkert smámál að snúa aftur eftir 16 mánaða fjarveru þegar menn eru komnir yfir þrítugt. Hann á heiður skilinn fyrir þetta," sagði Ferguson.