Skortur á skyri vegna skjálftans

Starfsstöð Mjólkursamsölunnar á Selfossi varð fyrir barðinu á skjálftanum í gær. Þá féllu til tankar í svokallaðri skyrgerð og því má búast við skorti á skyri sem framleitt er á Selfossi á næstu dögum. Páll Vilhjálmsson framkvæmdarstjóri framleiðslusviðs Mjólkursamsölunnar segir fyrirtækið strax hafa farið í að koma upp öðrum tönkum.

„Við eigum aðra tanka og það var farið strax í að koma þeim upp snemma í morgun. Við reiknum með að vera komnir í framleiðsluhæft ástand um miðja næstu viku, jafnvel fyrr," segir Páll en það er aðallega skyr.is sem er framleitt á Selfossi.

„Það var þetta sem var mest sjáanlegt en það voru einnig ýmsar vélar sem færðust til."

Það má því búast við nokkrum skorti á skyr.is á næstunni.