Hæstiréttur felldi gæsluvarðhald yfir Rúmenum úr gildi

Hæstiréttur Íslands hefur fellt úr gildi gælsluvarðhaldsúrskurð Héraðsdóms Reykjaness yfir tveimur Rúmenum sem komu hingað til lands þann 18. maí.

Það var lögreglan á Suðurnesjum sem fór fram á gæsluvarðhaldið en við leit í farangri Rúmenanna fann lögregla og tollgæsla 60 óútfyllt kort, samskonar og greiðslukort sem höfðu að geyma segulrönd. Voru kortin vandlega falin innan um klæðnað í ferðatöskum þeirra.

Lögreglu grunar að kortin hafi átt að nota með ólögmætum hætti og krafðist þess að Rúmenarnir yrðu úrskurðaðir í gælsuvarðhald. Við því var orðið í héraði en Hæstiréttur felldi þann úrskurð hins vegar úr gildi. Var það gert þar sem ekki þótti kominn fram nægur rökstuðningur fyrir frelsissviptingu fólksins. Var þeim því sleppt úr haldi.