Dýrabein rannsökuð áfram

Rannsókn á dýrabeinum sem fundust í húsgrunni við Lyngholt í Garðabæ í gærkvöldi verður haldið áfram í dag. Grunur leikur á að þau séu smituð af miltisbrandi.

Varðstjóri í slökkviliðinu sagði í samtali við Vísir.is í gærkvöldi að lítil hætta væri á ferðum. Hins vegar ætti fólk ekki að fara inn á svæðið við húsgrunninn en búið er að girða hann af. Íbúi við hliðina á húsgrunninum gagnrýnir lögreglu og slökkvilið fyrir að hafa ekki talað strax við nágrannana og veitt þeim leiðbeiningar.

Hann sagði jafnframt að beinin hefðu fundist á túni þar sem ekki hafi verið leyfilegt að byggja í áratugi. Áður fyrr hafi bændabýli verið á túninu og vitað er að dýrum var slátrað á býlinu og þau grafin í túninu.