Mikilvægt að segja fólki ef maður elskar það, segir Krummi

"Svala og þau eru öll að ná sér sem betur fer. Bílbeltin bjarga mannslífum. Þegar maður á svona nána vini og fjölskyldu þá sér maður hvað lífið er dýrmætt og fallegt," svarar Krummi Björgvinsson aðspurður um líðan systur hans, Svölu, sem slasaðist ásamt kærasta sínum og tveimur bræðrum hans og föður í bílslysi á Reykjanesbraut við Vogaafleggjara í 9. apríl síðastliðinn.

"Það er mikilvægt að segja fólki sem maður elskar að maður elski það því maður veit aldrei hvað gerist."

"Ég er helvíti glaður. Núna as we speak erum við í Mínus að semja og taka upp plötuna Akustík (órafmagnaður kassagítar). Við vorum að enda við að gera lítið stúdíó í Hlíðunum," svarar Krummi Björgvinsson þegar talið berst að honum og tónlistinni.

"Ég er að ferðast og túra í sumar. Það er mikið að gera í músíkinni. Ég og Daníel Ágúst vorum að klára Esju plötuna og hún er að fara í framleiðslu eftir nokkra daga. Við erum bestu vinir í heimi og ég er ógeðslega glaður að ég skuli þekkja hann. Síðan við kynntumst erum við búnir að vinna saman. "

Skilnaður og flutningar

"Ég fæ ekki íbúð fyrr en 5. júní en ég hef undanfarið búið hjá vinum mínum og vandamönnum og er að bíða þangað til ég fæ hana. Þá flyt ég inn og verð heill maður á ný," svarar Krummi þegar við spyrjum hann hvort það sé rétt að hann sé heimilislaus eftir skilnaðinn við Hörpu Einarsdóttur.

"Ég og Harpa áttum gott samband og við munum vera vinir að eilífu. Hún er dásamleg manneskja. Ég er frjáls eins og fuglinn þó einkalífið hafi ekki verið upp á sitt besta undanfarið. Mér líður mjög vel."

"Nei ég drekk ekki eins og gerði einu sinni. Ég hætti því fyrir nokkrum árum en ég er enginn kórdrengur," segir Krummi spurður hvort hann sé hættur að djúsa.

Esja spilar næst á Bifröst 22. maí næstkomandi.