Þrettán þúsund króna hrekkur í Morgunblaðinu

Það kostar rúmar 13 þúsund krónur að fá dánartilkynningu birta í Morgunblaðinu, segir Gylfi Þór Þorsteinsson, auglýsingastjóri blaðsins.

Í morgun birtist tilkynning um að Hákon Rúnar Jónsson væri látinn. Síðar um morguninn birtist svo frétt á fréttavef Morgunblaðsins þar sem sagt var frá því að fréttir af andláti Hákonar væru stórlega ýktar. Gylfi vill ekki segja til um hver pantaði auglýsinguna. Hann segir það meginreglu að gefa ekki upp nöfn þeirra sem panti auglýsingar hjá blaðinu, hvort sem um ræði dánartilkynningu eða annað efni.

Gylfi Þór segir að það sé erfitt að breyta verkreglum við meðferð dánartilkynninga, þrátt fyrir þetta atvik. „Það er voðalega erfitt að eiga við þetta. Vegna þess að við getum ekki farið fram á dánarvottorð, vegna þess að það er ekki alltaf tilbúið þegar að fólk vill að dánartilkynningin birtist," segir Gylfi.

Hann segir þó að reynt sé eftir fremsta megni að sannreyna þær upplýsingar sem að blaðinu berist. Í þessu umrædda tilfelli hafi greiðandinn til dæmis verið skráður á rétt heimilisfang samkvæmt þjóðskrá og allt litið eðlilega út. „Þannig að þetta var svona einbeittur brotavilji," segir Gylfi. Sé hins vegar eitthvað grunsamlegt í auglýsingunum að þá sé reynt að kanna það mál. „Það er náttúrulega bara ömurlegt að menn séu þannig innrættir að þeir misnoti þessar tilkynningar með þessum hætti," segir Gylfi.