Sakar forráðamenn Tottenham um hræsni

Forseti spænska knattspyrnufélagsins Sevilla segir að stjórnarformaður Tottenham sé hræsnari sem hafi fengið mátulega á baukinn þegar hann missti þá Dimitar Berbatov og Robbie Keane frá félaginu í sumar.

Daniel Levy kvartaði sáran undan starfsaðferðum Liverpool og Manchester United í viðleitni sinni til að kaupa þá Keane og Berbatov í sumar, en forseti Sevilla segir að þar hafi komið vel á vondan.

Jose Maria del Nido, forseti Sevilla, segir að Tottenham hafi notað sömu aðferðir við að lokka til sín knattspyrnustjórann Juande Ramos á sínum tíma og því hafi félagið fengið réttilega á baukinn þegar það var beitt sömu aðferðum í sumar.

"Það setti stórt strik í reikninginn okkur þegar Ramos flúði til London á sínum tíma og því gleður það mig að Tottenham hafi nú fengið að upplifa svipaða hluti í kring um Dimitar Berbatov. Kvartanir Tottenham eru hræsni í sinni hreinustu mynd," sagði forsetinn.

Hann benti líka á að Tottenham hefði verið að reyna að kaupa spænska landsliðsmanninn Diego Capel frá Sevilla í sumar, en tilboðinu hafi aðeins verið neitað af því Tottenham átti í hlut.

"Við gáfum upp verð sem við sættum okkur við fyrir leikmanninn en Tottenham vildi ekki greiða þá upphæð. Ég verð að viðurkenna að ef um eitthvað annað félag en Tottenham hefði verið að ræða - hefði sú upphæð væntanlega verið mun lægri. Við vildum einfaldlega ekki selja hann til Tottenham," sagði forsetinn.