Vilja að Vilhjálmur víki

Upplausnarástand ríkir nú innan borgarstjórnarflokks sjálfstæðismanna og óvissa um framtíð Vilhjálms Þ. Vilhjálmssonar, oddvita flokksins. Þær raddir gerast háværari innan flokksins að Vilhjálmur víki til hliðar.

Staða Vilhjálms Þ. Vilhjálmsson innan borgarstjórnarflokks sjálfstæðismanna hefur veikst dag frá degi eftir að skýrsla stýrihóps borgarráðs um málefni REI og Orkuveituna var birt opinberlega á fimmtudaginn. Óljósar yfirlýsingar Vilhjálms í tengslum við álit borgarlögmanns varðandi umboða hans til að samþykkja samruna REI og Geysis Green Energy hafa átt sinn þátt í því að veikja stöðu hans ennfrekar.

Þær raddir gerast nú háværari innan Sjálfstæðisflokksins að Vilhjálmur verði að stíga til hliðar. Samkvæmt heimildum Stöðvar 2 er vonast til þess að Vilhjálmur taki þá ákvörðun sjálfur en ekki liggur fyrir hvort hann sé reiðubúinn til þess.

Málið er á mjög viðkvæmu stigi og hefur gengið erfiðlega að ná tali af borgarfulltrúum flokksins í dag. Hafa þeir hvorki svarað símtölum né skilaboðum. Fréttastofa náði þó tali af tveimur sem treysta sér hvorki til að lýsa yfir stuðningi við Vilhjálm né tjá sig frekar um málið. Í 24 stundum í dag er hins vegar haft eftir Þorbjörgu Helgu Vigfúsdóttur, borgarfulltrúa sjálfstæðismanna, að hún treystir sér ekki til fullyrða að Vilhjálmur eigi afturkvæmt í borgarstjórastólinn.

Að sögn heimildarmanna fréttastofu er almennt litið til Geirs H. Haarde til að binda enda á það óvissuástand sem nú ríkir innan borgarstjórnarflokksins. Hann vildi þó ekki tjá sig um málið þegar fréttastofa leitaði eftir því í dag.

Samkvæmt heimildum er þó líklegt að málið munið skýrast fljótlega á næstu dögum.

Fari svo að Vilhjálmur víki er ekki ósennilegt að við taki valdabarátta innan borgastjórnarflokks sjálfstæðismanna. Eru Hanna Birna Kristjánsdóttir og Gísli Marteinn Baldursson helst nefnd í því samhengi en einnig hefur nafn Júlíusar Vífils borið á góma.

Þá er einnig óljóst hvaða áhrif þetta mun hafa á meirihlutasamstarfið í borginni. Ekki náðist í Vilhjálm Þ.Vilhjálmsson í dag þrátt fyrir ítrekaðar tilraunir.