RES Orkuskóli settur í fyrsta sinn í dag á Akureyri

RES Orkuskólinn var settur í fyrsta sinn í dag. Undanfarin fjögur ár hefur verið unnið að uppbyggingu skólans en RES er einkarekin mennta- og vísindastofnun sem mun byggja starfsemi sína á forystu Íslendinga á sviði orkumála.

Boðið er upp á eins árs alþjóðlegt meistaranám (MSc) í vistvænni orkunýtingu, auk leiðtogaskóla og sumarnámskeiða með áherslu á endurnýjanlega orkugjafa. Skólinn er staðsettur á Akureyri og starfræktur í samstarfi við Háskóla Íslands og Háskólann á Akureyri. 31 nemandi frá tíu löndum hefur nú meistarnám við skólann í vistvænni orkunýtingu.

Þorgerður Katrín Gunnarsdóttir menntamálaráðherra setti skólann við hátíðlega athöfn í Ketilhúsinu á Akureyri í dag en auk hennar fluttu ávörp þeir Dr. Björn Gunnarsson, forstöðumaður RES, Tryggi Þór Haraldsson, forstjóri RARIK, Dr. Masami Nakagawa, prófessor við Colorado School of Mines í Bandaríkjunum og Dr. Tadeusz Kulik, aðstoðarrektor Tækniháskólans í Varsjá, eins fremsta tækniháskóla Evrópu.

Mikil ásókn hefur verið í skólann og eru yfir 30 nemendur víðsvegar að úr heiminum skráðir til náms á komandi skólaári. Nemendurnir koma flestir frá erlendum háskólum þar sem þeir hafa lagt stund á verkfræði eða raunvísindi á meistara- og doktorsstigi. Námið er byggt upp sem eins árs, þriggja anna nám og verður á þessu ári boðið upp á nám á sviðum jarðvarma, efnarafala, og vistvæns eldsneytis og lífmassa.