Vilhjálmur staðfestir að Hjörleifur sé lögmaðurinn

Vilhjálmur Þ. Vilhjálmsson fyrrum borgarstjóri hefur staðfest í samtali við Vísi að fyrrverandi borgarlögmaður sá sem hann ráðfærði sig við sé Hjörleifur Kvaran. Að öðru leyti vísar Vilhjálmur í yfirlýsingu sína frá því í gær.

Vilhjálmur sendi frá sér yfirlýsingu í gær þar sem hann áréttaði orð sín í Kastljósþætti Ríkissjónvarpsins um hann hefði ekki átt við að Kristbjörg Stephensen borgarlögmaður hefði sagt hann hafa umboð til að undirrita sameiningarsamning REI og Geysis Green Engergy.

Í yfirlýsingunni sagðist hann hafa ráðfært sig við fyrrverandi borgarlögmann, án þess að nafngreina hann. Nú hefur hann staðfest að um Hjörleif hafi verið að ræða.

Vilhjálmur sagði í Kastljósþættinum að sér „hefði ekki dottið í hug að undirrita svona samning nema hafa skýrt umboð til þess".

Hjörleifur B. Kvaran sagði í samtali við Vísir í gærkvöldi að hann teldi ljóst að Vilhjálmur hafi átt við sig.