Amy þakin nikótínplástrum og étur eins og hross

„Það eina sem má fara ofan í lungun á henni eru hreint loft," sagði Mitch pabbi Amy Winehouse í útvarpsviðtali í dag. Hann sagði hana þakta í nikótínplástrum, enda þyrfti hún að halda sér á beinu brautinni ætli hún að halda röddinni.

Söngkonan þjáist eins og fram hefur komið af lungnaþembu, og hafa læknar varað hana við því að haldi hún áfram að reykja tóbak og eiturlyf muni hún ekki bara missa röddina, heldur lífið.

Winehouse, sem þjáist einnig af óreglulegum hjartslætti, hneig niður á heimili sínu í London fyrir viku, og hefur síðan verið undir eftirliti lækna. Að sögn föðurins vill hún fyrir alla muni taka sig á. Hún éti nú eins og hross, og hafi lofað að halda sér edrú. Hann viðurkenndi þó einnig í viðtalinu að hann væri afar hræddur um að Amy færi í sama farið um leið og hún losnaði af spítalanum, og yrði „dauð innan þriggja mánaða."