Jóhanna Vilhjálms veiddi Maríulaxinn kasólétt

„Þetta var bara stórkostleg upplifun en það var einnig mjög góð tilfinning að sleppa honum," svarar Jóhanna Vilhjálmsdóttir fjölmiðlakona þegar Vísir spyr hana út í Maríulaxinn sem hún veiddi í drottningu laxánna, Laxá í Aðaldal, um helgina.

Jóhanna og sambýlismaður hennar Geir Sveinsson eiga von á sínu fimmta barni 5. desember næstkomandi.

„Maríulaxinn var 11 punda hrygna. Ég fékk hann á fyrsta klukkutímanum og síðan veiddi ég eina 13 punda hrygnu. Við vorum saman kvennahópur sem nefnist Kavíarklúbburinn. Þetta var stórkostlegt. Og það jafnast fátt á við að standa í vöðlum upp á mitti í miðri á að kvöldi til þegar vindinn lægir með fullt tungl og fjallasýnina fyrir augum. Það gerist ekki fallegra."

Er í lagi að vaða út í miðja á Jóhanna með barn undir belti? „Já fyllsta öryggis er alltaf gætt í hvívetna. Ég var með alveg frábæran leiðsögumann hann Steina sem þekkti ánna eins og lófann á sér og þar fyrir utan var ég að sjálfsögðu í góðum og hlýjum fatnaði þannig að mér varð aldrei kalt."