Vilja upplýsingar um framgöngu lögreglu gagnvart stóriðjumótmælendum

Þingmenn Vinstri - grænna hafa lagt fram beiðni um skýrslu frá dómsmálaráðherra á Alþingi þar sem upplýst verði um framgöngu lögreglu gagnvart mótmælendum Kárahnjúkavirkjunar og stóriðjuframkvæmda á árunum 2005, 2006 og 2007. Vilja þingmennirnir bæði fá upplýsingar um aðgerðir lögreglu gagnvart mótmælendum sem dvöldust á virkjunarsvæði við Kárahnjúka og í námunda við álverslóðina í Reyðarfirði.

Þá er einnig óskað upplýsinga um aðgerðir lögreglu gagnvart mótmælendum á Snorrabraut 14. júlí í fyrra og við álver Alcan í Straumsvík í sama mánuði. Enn fremur vilja þingmennirnir að tilgreindar verði heimildir fyrir því inngripi sem lögregla þarf lögum samkvæmt heimildir dómstóla til að framkvæma, eins og húsleitarheimildir og hleranir á símum og tölvupósti.

Fram kemur í greinargerð með beiðninni að markmiðið með henni sé að kanna hvort lögregluaðgerðir gegn mótmælendum hafi staðist ákvæði stjórnarskrár og laga um hugsana- og skoðanafrelsi, tjáningarfrelsi, persónufrelsi og friðhelgi einkalífs. Hafa beri í huga að fundafrelsi sé meðal stjórnmálalegra réttinda sem viðurkennd séu og heimila mönnum að efna til funda, þar með talið mótmælafunda. Það sé því mikilvægt í lýðræðisþjóðfélagi að borgararnir fái notið þeirra réttinda, með öðrum orðum að mannréttindi þeirra séu viðurkennd og vernduð.

Þá er vísað til þess að í fjölmiðlum hafi ítrekað komið fram ásakanir ásakanir á hendur lögreglu um harðræði, tilefnislausar árásir, eftirför og frelsissviptingu. ,,Í málsvörn sinni hefur lögreglan m.a. vísað til 15. gr. lögreglulaga, nr. 90/1996, þar sem kveðið er á um heimild lögreglu til að hafa afskipti af borgurunum til að halda uppi almannafriði og allsherjarreglu, en í fjölmiðlum hafa komið fram áleitnar efasemdir um að mat lögreglu á aðstæðunum hafi í öllum tilfellum verið með þeim hætti að það kallaði á aðgerðir þær sem beitt var," segir í greinargerðinni.