Við ætlum að leiða stuðningshópinn á pöllunum, segir Atli Þór í Peking

„Við erum öll spennt að bíða eftir leiknum," svarar Atli Þór Albertsson, annar stjórnandi útvarpsþáttarins frá A-J á Rás 2, sem er staddur í Peking þegar Vísir spyr út í stemninguna fyrir leik Íslenska handboltalandsliðsins gegn Spánverjum í undanúrslitum Ólympíuleikanna sem fram fer í dag.

„Ólympíusambandið íslenska bað okkur Jóa um að leiða þennan stuðningshóp sem er hér á pöllunum og það er búið að láta búa til boli og fána og alls konar dót til þess að gera þetta flott og stórt."

„Við höfum hingað til verið eins og frímerki á A4 blaði í höllinni en mér skilst að stuðningshópurinn skili sér vel í sjónvarpi landsmanna. "

„Við Jói ætlum að leggja okkur alla fram við að búa til gríðarlega stemningu á leiknum á eftir og syngja lög eins og Öxar við ána. Hvort sem þessi leikur vinnst eða *bíp* eins og Ólafur Stefánsson fyrirliði myndi segja, þá er árangurinn frábær og það er einstakt fyrir okkur Íslendinga á litlu eyjunni í norðri að hafa náð svona langt."