Vilja aðildarviðræður í forgang

Stjórn Neytendasamtakanna leggur áherslu á að hagsmunir neytenda og alls almennings verði hafðir að leiðarljósi við uppbyggingu íslensks samfélags um leið og núverandi björgunaraðgerðum lýkur. Í því sambandi minnir stjórnin á samþykkt þings samtakanna frá því í haust um að þegar verði látið reyna á það með aðildarviðræðum hvort hægt sé að ná viðunandi samningum um inngöngu Íslands í Evrópusambandið.

,,Hagmunir neytenda í þessu máli eru það miklir að þetta mál verður að setja í forgang með aðildarumsókn," segir í ályktun stjórnar samtakanna.

Að mati stjórnar Neytendasamtakanna er ljóst að aðildarumsókn nú er nauðsynleg í því uppbyggingarstarfi sem framundan er í íslensku efnahagslífi og erfitt er að sjá það fyrir sér hvernig það á að heppnast án umsóknar.

,,Ljóst er að krónan hefur dugað þjóðarbúinu illa og því er eðlilegt að skoðað verði að taka upp annan gjaldmiðil. Strax með aðild að ESB, og jafnvel umsókn einni saman, getur krónan strax komast í ákveðið „skjól" af evrunni," segir í ályktuninni.