Mögnuð menningartengsl Reykjavíkur og Grundarfjarðar

Glöggir lesendur tímaritsins What´s on in Reykjavík hafa sumir hverjir veitt því athygli að forsíðumynd nýjasta tölublaðsins tengist alls ekki neinu sem hefur verið á döfinni í Reykjavík heldur er hún tekin á hátíðinni „Á góðri stund í Grundarfirði" nú í sumar en eins og sá titill ber með sér fer hátíðin fram í Grundarfirði en ekki í Reykjavík.

„Mér dettur nú helst í hug að þeir hafi bara valið einhverja flotta mynd og okkur Grundfirðingum finnst þetta að sjálfsögðu bara heiður," segir Jónas Víðir Guðmundsson, markaðsfulltrúi Grundarfjarðarbæjar, sem telur tiltækið hið sniðugasta og ekki fallið til þess að móðga nokkurn mann þrátt fyrir að myndefnið og heiti tímaritsins fari ekki alfarið saman.

Undir þetta tekur Ingvar Kristjánsson, ritstjóri What´s on in Reykjavík sem Heimur hf. gefur út. „Þarna var nú bara einn blaðamaður frá okkur staddur og reif bara upp myndavélina þegar hann sá gott myndefni. Svo leist okkur bara vel á myndina," segir Ingvar og kveður það tilviljun eina að Páll Kjartansson ljósmyndari og blaðamaður var þarna á ferð á hárréttum tíma. Gott myndefni sé gott myndefni og slíkt nái út fyrir gröf, dauða og mörk sveitarfélaga.