Ríkisstjórnin undirbúi göng milli Súðavíkur og Ísafjarðar

Hafin er undirskriftasöfnun á Netinu þar sem skorað er á ríkisstjórnina að hefja strax rannsóknir og undirbúning að jarðgangagerð milli Súðavíkur og Ísafjarðar út frá samfélagslegum og öryggissjónarmiðum.

Bent er á að tíð snjóflóð og grjóthrun á Súðavíkur- og Kirkjubólshlíð geri samgöngur milli Súðavíkur og Ísafjarðar algjörlega óviðunandi. Ekki sé minni hætta að aka þá leið en Óshlíðina milli Ísafjarðar og Bolungarvíkur. Þegar hefur verið ákveðið að ráðast í göng þar.

„Það er réttlætismál að íbúum Súðavíkur og Ísafjarðar og öðrum sem leið eiga um svæðið verði gert mögulegt að komast á milli þessara staða án þess að lífum sé stefnt í voða vegna ofanflóða," segir á heimasíðunni, gong.it.is. Tæplega 380 manns höfðu skrifað undir áskorunina klukkan 13.30 í dag.