IKEA innkallar gluggatjöld

IKEA hefur ákveðið að innkalla felligluggatjöldin IRIS og ALVINE og biður alla þá sem eiga slík gluggatjöld með ákveðinni framleiðsludagsetningu að hafa samband við verslunina. Prófanir í Bandaríkjunum hafa sýnt að gluggatjöldin uppfylla ekki allar öryggiskröfur sem gerðar eru. Tilkynning frá IKEA er hér að neðan:

„IKEA biður alla viðskiptavini sína, sem eiga IRIS eða ALVINE felligluggatjöld merktum framleiðsludagsetningunni 0823 (ár, vika) eða fyrr, vinsamlegast að hafa samband við þjónustudeildina í síma 520-2500 eða koma á þjónustuborðið í versluninni (Skilað og skipt) og fá viðgerðarpakka sendan ókeypis í pósti. Pakkinn inniheldur stoppara og leiðbeiningar. Þetta á ekki við um önnur gluggatjöld en þau sem tilgreind eru hér."

„IKEA vörumerkið, númer framleiðanda og framleiðsludagsetning (ár, vika) er að finna á hvítum límmiða á felligluggatjöldunum.

Prófanir í Bandaríkjunum hafa sýnt að IRIS og ALVINE felligluggatjöldin uppfylla ekki allar öryggiskröfur sem gerðar eru. Böndin á felligluggatjöldunum eru ekki með stoppara en þeir eiga að koma í veg fyrir að hægt sé að flækjast í böndunum.

Við mælum eindregið með því að allir sem eiga IRIS eða ALVINE felligluggatjöld með framleiðsludagsetningunni 0823 (ár, vika) eða fyrr, fái stoppara hjá okkur og festi á gluggatjöldin. IRIS og ALVINE felligluggatjöld með framleiðsludagsetningunni 0830 (ár, vika) eða síðar eru með þessum stoppurum og uppfylla þar með allar nauðsynlegar öryggiskröfur.

Allar nánari upplýsingar er að fá hjá IKEA í síma 520-2500"