Moore gerir framhald Farenheit 9/11

Leikstjórinn Michael Moore hyggst gera framhald á geysivinsælli heimildamynd sinni, Farenheit 9/11. Myndin fjallaði um afleiðingar hryðjuverkanna ellefta september á bandarískt þjóðfélag og stöðu þess í heiminum og var harkaleg og jafnan fyndin gagnrýni á George Bush og stjórn hans.

Sú gagnrýni hitti í mark, og varð 9/11 fyrsta heimildarmynd allra tíma til að þéna meira en hundrað milljónir dollara í bandaríkjunum, auk þess sem hún hlaut fjölda verðlauna, þar á meðal Gullpálmann í Cannes.

Nýja myndin mun róa á svipuð mið og sú fyrri, þó án þess að taka Bush núverandi sérstaklega fyrir. Áætlað er að frumsýna hana næsta vor, stuttu eftir að forsetinn núverandi lætur af embætti.