Mannæta á leið til Þýskalands

Bók Þórarins Leifssonar, Leyndarmálið hans pabba, fyndin og frumleg spennusaga um fjölskyldu með óvenjulegt leyndarmál, vakti töluverða athygli erlendra útgefanda á bókasýningunni í Bologna síðastliðinn aprílmánuð.

Einn þeirra sem heilluðust af bókinni er útgefandi hjá þýska gæðaforlaginu Leipziger Kinderbuchverlag sem nú hefur fest kaup á útgáfuréttinum á þýsku og hyggst gefa bókina út og dreifa henni í Þýskalandi, Austurríki og Sviss strax í haust.

Leyndarmálið hans pabba, sem kom út hjá Forlaginu fyrir síðustu jól, er óvenjuleg hryllingssaga um venjulega krakka sem eiga hræðilegt leyndarmál. Um leið er þetta saga um raunverulegt vandamál sem margir krakkar glíma við - togstreituna um hvenær eigi að þegja og hvenær eigi að segja frá.

Þórarinn Leifsson hefur myndskreytt bækur, bókarkápur og blaðagreinar. Meðal verka hans eru myndskreytingar við röð ævintýra eftir H.C. Andersen sem kom út víða á Norðurlöndum. Hann var meðhöfundur að barnasögunni Algjört frelsi ásamt Auði Jónsdóttur. Leyndarmálið hans pabba er fyrsta skáldsaga hans handa börnum.