Steinunn Sigurðardóttir hlýtur sænsk hönnunarverðlaun

Steinunn Sigurðardóttir fatahönnuður hlýtur hin sænsku Söderbergs-hönnunarverðlaun í ár. Verðlaunaféð nemur einn milljón sænskra króna, um 12 milljónir íslenskra.

Á heimasíðu sendiráðs Íslands í Svíþjóð er að finna álit dómnefndar. Þar segir að eftir að Steinunn hafi unnið hjá mörgum þekktum tískuhúsum hafi hún þróað sína eigin línu sem hefði vakið mikla athygli á alþjóðavettvangi. Línan vitni um mikla þekkingu á efnum og fatahönnun. „Steinunn Sigurðardóttir hefur með íslenska náttúru sem innblástur fært Norðurlöndunum virtan fulltrúa á hinu alþjóðlega tískusviði," segir í álitinu.

Verðlaunin verða afhent þann 4. nóvember í Röhsska-safninu í Gautaborg og verða hönnunarverk hennar til sýnis á safninu í kjölfarið.

Við þetta má bæta að Steinunn hefur unnið hjá fremstu fatahönnuðum heims, Gucci, Ralph Lauren, Calvin Klein og La Perla en rekur nú eigið fyrirtæki, STEiNUNN. Hún hlaut í fyrra norrænu hönnunarverðlaunin Ginen.