Ríkisstjórnin gagnrýnd fyrir aðgerðaleysi í eldsneytismálum

Stjórnarandstaðan á Alþingi gagnrýndi í dag ríkisstjórnarflokkanna fyrir aðgerðarleysi í ljósi hækkandi eldsneytisverð.

Höskuldur sagði almenning búinn að fá nóg, hann gæti ekki tekið við meiri hækkunum og byrðum og krefðist aðgerða. Spurði hann hvað sjálfstæðismenn hygðust gera í þessu brýnasta hagsmunamáli almennings í dag, hvort þeir ætluðu að lækka álögur á eldsneyti eða festa sig í sessi sem mesti skattpíningarflokkur sögunnar.

Hægt að lækka bensín- og olíugjald

Gunnar Svavarsson, formaður fjárlaganefndar og þingmaður Samfylkingarinnar, benti á að orð væru til alls fyrst. Bæði samgönguráðherra og fjármálaráðherra hefðu boðið vörubílstjórum til fundar til þess að ræða málin. Benti hann á að hækkanirnar tengdust hækkunum á heimsmarkaðsverði. Þegar bensín hefði hækkað á svipaðan hátt árið 2002 hefði ríkisstjórnin lækkað bensíngjald tímabundið um nokkrar krónar. Taldi hann ekki rétt að breyta virðisaukaskattskerfinu vegna þessa heldur frekar skoða lækkanir á bensín- og olíugjaldi.

Grétar Mar Jónsson, þingmaður Frjálslynda flokksins, benti á að með því að lækka eldsneytisverð væri verið að hafa áhrif á verðbólguna. Hana þyrfti að lækka með öllum ráðum.

Kristján Þór Júlíusson, þingmaður Sjálfstæðisflokksins, benti á að vinna stæði nú yfir við það að breyta gjaldtöku af olíu og bensín með það að markmiði að fleiri nýttu sér umhverfisvænni kosti. Þá sagði hann fleira hvíla á herðum almennings en hátt olíuverð. Efnahagsástandið legðist einnig þungt á almenning.

Skilur ekki sofandahátt ríkisstjórnarinnar

Steingrímur J. Sigfússon sagðist ekki skilja hvers vegna ríkisstjórnin brygðist ekki við og lækkaði olíugjald á dísilolíu þannig að hún yrði ódýrari en bensínið. Upphaflega hafi verið stefnt að því. Sagðist hann ekki skilja þennan sofandahátt.

Höskuldur Þórhallsson sagði lítils að bjóða til kaffiboðs eins og ráðherrar hefðu gert. Það væri ekki þau skilaboð sem almenningur þyrfti á að halda nú. Tími aðgerða væri runninn upp.