Berbatov fær ekki að reykja hjá United

Dimitar Berbatov mun þurfa að bæta líkamlegt form sitt ef hann ætlar sér að vinna sér sæti í liði Manchester United og þá verður hann líka að hætta að reykja. Þetta segir heimildamaður helgarblaðsins News of the World.

Berbatov flaug í gegn um læknisskoðun þegar hann var keyptur fyrir rúmar 30 milljónir punda frá Tottenham, en heimildir News of the World herma að Búlgarinn sé þó ekki í líkamlegu formi sem hæfi "United-stöðlum."

Vitað er að Berbatov á það til að reykja sígarettur og óvíst er að sá ósiður falli vel í kramið hjá Sir Alex Ferguson. Reykingar eru með öllu bannaðar á æfingasvæði félagsins.