Ekkert öfugsnúið við hækkanir

Fjármálaráðherra segir ekkert öfugsnúið við það að verðtryggð fasteignalán heimilanna hækki um tvöfalda þá upphæð sem ríkið fær í kassann af hækkun gjalda á bensín, áfengi og tóbak. Flestar ef ekki allar leiðir ríkisins til að auka tekjur hækki vísitölu og þar með skuldir heimilanna.

Eins og fram hefur komið samþykkti alþingi á fimmtudagskvöld að hækka gjöld á tóbaki, áfengi, olíu og bílum. Vonast er til að þessar hækkanir skili rösklega þremur og hálfum milljarði í ríkissjóð. Sá böggull fylgir skammrifi að samkvæmt útreikningum Hagstofunnar og Alþýðusambands Íslands er búist við að þessi tekjuaukning ríkissjóðs leggist af tvöföldum þunga ofan á skuldir heimilanna. Það er þegar gjöldin hækka, þá hækkar vísitalan sem aftur hækkar verðtryggð húsnæðislán heimilanna - um allt að sjö milljarða króna.

Ingibjörg sólrún segir það kunni vel að vera að frekar ætti að hækka almenna skatta. Árni Mathiesen fjármálaráðherra segir hækkanirnar ekki nýjar, þær hafi verið boðaðar í hinu úrelta fjárlagafrumvarpi fyrir bankahrunið enda hafi gjöldin verið að rýrna að raungildi árum saman.