Tæknin þaggaði niður í Sprengjuhöllinni

Kastljós sendi í gær beint út frá sundlaugarbakkanum í Laugardal þar sem Sprengjuhöllin tók nýtt lag sitt, Sumar í Múla. Eitthvað gekk þó ekki sem skyldi, og einungis heyrðist í hljóðnemum tveggja hljómsveitameðlima af fimm.

„Þetta var bara eitthvað tæknilegt klúður eins og getur alltaf gerst í beinum útsendingum," segir segir Atli Bollason, hljómborðsleikari Sprengjuhallarinnar. „Þetta hljómaði ágætlega á sundlaugabakkanum, en það hefur einhvernveginn ekki skilað sér út til sjónvarpsáhorfenda."

Atli segir þetta það vissulega svekkelsi að svo hafi farið, því sveitin hafði verði í lauginni meira og minna allan daginn að undirbúa sig. „Það var samt bara gaman að hanga í Laugardalslaug í þessu góða veðri," segir Atli, og bætir við að vandræðum hljómsveitameðlima hafi þó ekki verið lokið með hljóðleysinu.

„Við vorum búnir að hanna mjög sérstakan endi á atriðið þar sem við hoppuðum allir út í sundlaug. Og við gerðum það. Um leið og við komum upp úr, rennandi blautir, var okkur hinsvegar sagt að við værum farnir úr loftinu," segir Atli, sem segir sveitina ekki af baki dottna þrátt fyrir vesenið. „Við látum bara betur í okkur heyra seinna, ef tæknin leyfir."

Kastljósinnslagið má sjá hér.