Guðlaugur Þór kynnir heilsustefnu

Guðlaugur Þór Þórðarson, heilbrigðisráðherra, kynnti í dag heilsustefnu sína á fundi þar sem voru saman komnir flestir þeir sem taka þátt í að hrinda stefnunni í framkvæmd.

Í tilkynningu frá Heilbrigðisráðuneytinu segir heilbrigðisráðherra að heilsustefnan sé liður í því að geta veitt heilbrigðisþjónustu á heimsmælikvarða. Snar þáttur í því væri að leggja stóraukna áherslu á forvarnir á öllum sviðum og stuðla að heilbrigðari lífsháttum einstaklinganna.

„Sagði ráðherra það brýnt að skapa þjóðfélag þar sem fólk ætti þess auðveldlega kost að taka heilsusamlegar ákvarðanir, einkum með geðrækt, næringu og hreyfingu í huga,“ segir í tilkynningunni.

Samfara kynningunni skuldbundu fjölmargir aðilar sig, með undirritun sérstakrar yfirlýsingar, að taka virkan þátt í að hrinda stefnunni í framkvæmd.

Yfirlýsingin er svo hljóðandi:

„Markmið heilsustefnunnar er að skapa samfélagslegar forsendur sem stuðla að bættri heilsu allra landsmanna. Öflugt samfélag byggir á góðu heilsufari og góðri líðan landsmanna. Því er afar brýnt að um heilsustefnuna sé breið samstaða og hún höfði til sem flestra, einstaklinga og hópa og hvetji þá til virkni. Þannig mun heilsustefnan hafa áhrif til eflingar samfélagsins í heild. Við undirrituð styðjum Heilsustefnuna, þá aðgerðaráætlun sem lögð er fram til kynningar, og viljum leggja okkar af mörkum til að stuðla að heilbrigðari lífsháttum landsmanna.“

Það voru ýmis félagasamtök, sveitarfélög, áhugahópar og fleiri sem rituðu undir yfirlýsinguna á fundinum í dag.

„Heilbrigðisráðherra lagði áherslu á mikilvægt framlag þriðja geirans til almannaheilla í þessu sambandi. Hann sagði þriðja geirann samanstanda af ýmsum frjálsum félagasamtökum og sjálfseignarstofnunum, sem tilheyrðu hvorki einkageiranum, þar sem fyrirtæki eru rekin með hagnað að leiðarljósi, né opinberum rekstri. Innan þriðja geirans störfuðu fjölmörg samtök og félög sem sinntu afar mikilvægum verkefnum á sviði lýðheilsu- og heilbrigðismála,“ segir í tilkynningunni.

„Góð heilsa er mikilvæg undirstaða lífsgæða. Með samstilltu átaki getum við ekki aðeins bætt heilsufar þjóðarinnar heldur einnig orðið öðrum þjóðum fyrirmynd,“ sagði heilbrigðisráðherra þegar hann kynnti stefnuna.