Nýtt bréf frá Bjarna Harðarsyni

Eftir undangengna daga má telja næsta víst að bréf frá Bjarna Harðarsyni í ritstjórnarpósthólfum séu opnuð fljótt og örugglega. Bjarni hefur nú snúið aftur til fyrri starfa sem bóksali, og farinn að senda frá sér tilkynningar sem slíkur.

Vísi barst svohljóðandi bréf í dag, í þetta sinn sannarlega ætlað fjölmiðlum:

„Sælir kæru fjölmiðlamenn. Ég get ekki ætlast til jafn mikillar athygli nú eins og síðast þegar ég notaði þetta snilldarlega póstsendingarkerfi til að koma tilkynningu á alla fjölmiðla. En engu að síður væri mér þægð í að þið lituð með velþóknun til þessa nýja starfs og birtuð eftirfarandi."

„Kær kv.

-b."

Og úr því hefð hefur skapast fyrir því að birta bréf frá Bjarna er okkur að sjálfsögðu ljúft og skyld að vekja athygli á birta tilkynninguna, sem er eftirfarandi:

Einar Kárason rithöfundur verður á fyrsta upplestrarkvöldi vetrarins í Sunnlenska bókakaffinu, fimmtudagskvöldið 20. nóvember klukkan 20:30. Auk Einars mun skáldkonan Unnur Sólrún Bragadóttir lesa úr nýrri ljóðabók sinni, kærleikskitl - óbærileg lífshamingja. Þetta er níunda ljóðabók Unnar. Bókin skiptist í þrjá hluta, Einsöng - barn er fætt - fjöldasöng. Fyrsti hlutinn inniheldur ljóð almenns eðlis, annar hlutinn hefur að geyma jólaljóð og sá þriðji tengist árstíðunum og því sem þeim fylgja.

Einar Kárason þarf varla að kynna fyrir lesendum en hann er eitt fremsta sagnaskáld þjóðarinnar í bráð og lengd. Að þessu sinni kemur frá Einari bókin Ofsi sem dregur nafn sitt af einum af minnipokamönnum Sturlungu, Eyjólfi ofsa, sem stóð að Flugumýrarbrennu. Eins og í fyrra skáldverki sínu frá öld Sturlunga, Óvinafagnaði, er þessi rósturtími Íslandssögunnar tekinn meistaralegum tökum í þessari nýjustu bók Einars.

Upplestrarkvöldið er öllum opið, aðgangur ókeypis og kaffiveitingar seldar vægu verði.