Bankamálaráðherra sat ekki fund með Davíð um stöðu bankanna

Björgvin G. Sigurðsson viðskiptaráðherra segir gagnrýni Davíðs Oddssonar seðlabankastjóra á stjórnvöld vegna viðvarana um stöðuna í bankakerfinu hafa komið á óvart. Hann vísar enn fremur í skýrslu Seðlabankans um fjármálastöðugleika en þar kom fram að bankakerfið stæði traustum fótum.

Davíð Oddsson seðlabankastjóri sagði á fundi Viðskiptaráðs í morgun að forsvarsmenn Seðlabankans hefðu ítrekað varað stjórnvöld við stöðu bankanna. Vísaði hann meðal annars til fundar sem forsvarsmenn Seðlabankans hefðu átt í London í febrúar með erlendum bankamönnum og greiningaraðilum. Þar hefðu hinir erlendu aðilar spurt hvað myndi gerast ef íslensku bankarnir hefðu ekki aðgang að lánsfé á mörkuðum. Það hefði verið ljóst af orðum þeirra að íslenska bankakerfið væri í mikilli hættu og seðlabankamönnum hefði brugðið mjög við það hvernig þessir aðilar sáu fyrir sér framtíðina á Íslandi.

Sagði Davíð að fundað hefði verið með íslenskum ráðherrum þegar heim var komið og gert grein fyrir stöðunni. Þeir hefðu rætt við forsvarsmenn viðskiptabankanna sem aftur hefðu fullvissað þá um að fjármögnun þeirra væri tryggð.

Samfylkingarþingmenn funda

Björgvin sagði í dægurmálaútvarpi Rásar 2 í dag að hann hefði ekki hitt Davíð Oddsson á árinu fyrr en hann kom á ríkisstjórn fyrr í haust. Hann hefði því ekki verið á umræddum fundi hans með ráðherrum. Sagði hann gagnrýni Davíðs koma á óvart, ekki síst í ljósi skýrslu Seðlabankans um fjármálastöðugleika sem birt var í maí. Þar komu ekki fram neinar alvarlegar áhyggjur af bankakerfinu.

Þingflokkur Samfylkingarinnar situr nú á fundi sem samkvæmt upplýsingum Vísis er þetta annar fundur flokksins í dag.

Árni Mathiesen fjármálaráðherra var einnig í viðtali í dægurmálaútvarpinu og hann sagðist hafa setið umræddan fund með stjórnendum Seðlabankans. Þá kom fram á vef RÚV og Morgunblaðsins fyrr í dag að Geir H. Haarde forsætisráðherra kannaðist við fundinn en þar sagðist hann ekki minnast þess að bankinn hefði lagt til að farið yrði í sérstakar aðgerðir sem ekki hafi verið orðið við.