Yfirgangur og tillitsleysi í Kópavogi

,,Þetta er ekkert annað en yfirgangur og tillitsleysi við íbúa í Kópavogi," segir Guðríður Arnardóttir, oddviti Samfylkingarinnar í Kópavogi, um ákvörðun bæjarráðs Kópavogs að setja umdeildar skipulagsbreytingar á Kársnesi í auglýsingu.

Samtökin Betri byggð á Kársnesi óttast að umferð aukist við þéttingu byggðar og engar ráðstafanir hafi verið gerðar. Formaður samtakanna segir íbúana hafa lítið um málið að segja þegar það er farið í auglýsingu.

Guðríður undrast vinnubrögð bæjaryfirvalda. ,,Það liggur ekkert á og þetta ferli á að vinna í samvinnu við íbúa." Fyrir viku var haldinn kynningarfundur þar sem framtíðarskipulag Kársness var kynnt. ,,Fólki gafst ekki færi á að koma með fyrirspurnir á fundinum og bæjaryfirvöld ítrekuðu að um kynningarfund væri að ræða," segir Guðríður. Tveimur dögum síðar lagði meirihlutinn til í bæjarráði að tillögurnar færu í auglýsingu.

Í framhaldinu óskaði minnihlutinn eftir aukafundi í bæjarstjórn sem haldinn var í dag. ,,Við óskuðum eftir að ferlinu yrði frestað þangað til að ítarlegri kynning fyrir íbúum Kársness hefur farið fram og fullunnin umhverfisskýrsla liggur fyrir," segir Guðríður og bætir við að skýrslan sé ókláruð. ,,Það er verið að vitna i 30 ára gömul gögn sem segja að líklega muni landfyllingarnar og framkvæmdin ekki hafa áhrif á vistkerfið."

Bæjarstjórn Kópavogsbæjar ákvað á aukafundinum í dag með sex atkvæðum gegn fimm að setja skipulagstillögurnar á Kársnesi í auglýsingu.

Guðríður segir að bæjaryfirvöld hafi glutrað niður gullnu tækifæri til að þróa veigamiklar skipulagsbreytingar á svæði sem flestir séu sammála um að þurfi að breyta í sátt og samvinnu við íbúa.

,,Það var búið að stíga mikilvæg skref frá tillögunum í fyrra en með afgreiðslunni í dag er verið að stíga tvö skref aftur á bak. Það var engan veginn tímabært að afgreiða tillöguna á þessari stundu."