Forsetinn fundaði með Jórdaníukonungi

Orkumál og framboð Íslands til öryggisráðs Sameinuðu þjóðanna var meðal þess sem Ólafur Ragnar Grímsson, forseti Íslands, og Abdullah annar Jórdaníukonungur ræddu á fundi sínum nýverið. Forsetinn kom við í Amman á leið sinni frá Bangladess á dögunum og þáði boð konungsins um heimsókn. Fram kemur í tilkynningu forsetaembættisins að Abdullah hafi verið fyrstur þjóðhöfðingja frá Mið-Austurlöndum til að koma í opinbera heimsókn til Íslands en það var árið 2000.

Þjóðhöfðingjarnir ræddu um möguleika á nýtingu jarðhita í Jórdaníu en sérfræðingar frá landinu hafa numið við Jarðhitaskóla Sameinuðu þjóðanna á Íslandi og konungurinn heimsótti virkjunina í Svartsengi þegar hann kom til Íslands.

Forseti lýsti hvernig þátttaka Íslendinga í jarðhitaverkefnum víða um heim hefur vaxið ört á undanförnum árum. Abdullah II konungur nefndi að ýmis ríki í Mið-Austurlöndum tækju þátt í fjárfestingum í Jórdaníu og gætu þau hugsanlega átt hlut að nýtingu hreinnar orku í landinu. Forseti Íslands rakti árangurinn af viðræðum sínum við forystumenn í Abu Dhabi og Katar fyrr á þessu ári.

„Þá ræddu konungur og forseti um framboð Íslands til öryggisráðs Sameinuðu þjóðanna og aukinn stuðning Íslendinga við málefni Palestínumanna sem m.a. hefði komið fram í heimsóknum utanríkisráðherra Íslands, Ingibjargar Sólrúnar Gísladóttur, til Jórdaníu, Palestínu og Ísrael. Konungur fagnaði þessum áherslum og lýsti sig og stjórnvöld í Jórdaníu reiðubúin til ítarlegra samræðna og samvinnu við Íslendinga óháð því hvort Ísland næði kjöri í öryggisráðið," segir í tilkynningu forsetaskrifstofu.