Nýtt fríblað á föstudag

Tímaritið Birta verður endurvakið og kemur fyrsta eintakið fyrir sjónir landsmanna á föstudag. Birta var lífsstílstímartit sem fylgdi Fréttablaðinu, en var lagt niður áramótin 2006-2007. Nýja Birtan verður líka borin út með Fréttablaðinu, en útgefandinn er Gram útgáfufélag. Guðni Björnsson útgefandi staðfesti það að blaðið kæmi út á föstudag, en vildi að öðru leiti ekki tjá sig um málið að svo stöddu.

Kristján Þorvaldsson fyrrverandi ritstjóri Séð og heyrt ritstýrir nýja blaðinu. Hann segir efnistök vera í þróun, en blaðið verði með nokkuð líku sniði og var. Sú breyting verður þó gerð að blaðið er öllu styttra, 48-64 síður, og allt prentað á glanspappír.

Margir hefðu talið það óðs manns æði að stofna fríblað í miðri kreppu, en Kristján segir svo ekki vera. „Ekki miðað við viðtökurnar. Þá er það alls ekki."