Segir sjálfstæðismenn nú fylgjandi útrás REI

Borgarfulltrúi Framsóknarflokksins segir sjálfstæðismennina sem sett hafi allt upp í loft í október vegna útrásarverkefna Orkuveitu Reykjavíkur nú fara fremsta í flokki við að fylgja þeirri stefnu sem samræmdist ekki grundvallarlíffsýn þeirra fyrir rétt fimm mánuðum og sprengdi þáverandi meirihluta.

Rætt var um nýja viljayfirlýsingu milli Reykjavík Energy Invest og yfirvalda í Djíbútí á borgarstjórnarfundi í dag. Þar benti Óskar Bergsson, borgarfulltrúi Framsóknarflokksins, að sama stefna væri nú mörkuð í útrásarmálum og í meirihluta Framsóknarflokks og Sjálfstæðisflokks.

,,Sjálfstæðisflokkurinn hljóp hins vegar frá þeirri stefnu vegna þess að það samræmdist ekki grundvallarhugmyndafræði þeirra að Orkuveita Reykjavíkur sinnti öðrum verkefnum en kjarnastarfsemi. Það samræmdist ekki grundavallarhugsjónum þeirra að blanda saman opinberum rekstri og einkarekstri í áhættusömum samkeppnisgreinum. Núna fer fyrir útrásarfyrirtækinu REI, borgarfulltrúi Sjálfstæðisflokksins, þar sem hann undirritar viljayfirlýsingar um auknar fjárskuldbindingar til útrásarverkefna," bendir Óskar á í bókun um málið á borgarstjórnarfundi.

Sjálfstæðismenn fylgi því þeirri stefnu sem samræmdist ekki grundvallarlífssýn þeirra fyrir rétt fimm mánuðum.