Kennarar vandi sig

Kennurum ber að vinna samkvæmt akademískum vinnubrögðum líkt og nemendum segir Stúdentaráð Háskóla Íslands í ályktun til fjölmiðla í dag.

Þar segir enn fremur að Háskóli Íslands eigi að vera leiðandi afl í leitandi þjóðfélagi. Ef Háskólinn eigi að rækja það hlutverk svo sómi sé af þurfi hann að sýna fordæmi sem komandi kynslóðir eigi að tileinka sér.

Því taki Stúdentaráð undir með Kristínu Ingólfsdóttur rektor þegar hún minni kennara og nemendur á að temja sér fagleg vinnubrögð í hvívetna. Með þessu vísar Stúdentaráð til máls Hannesar Hólmsteins Gissurarsonar, prófessors í stjórnmálafræði, sem dæmdur var fyrir brot á höfundarréttarlögum í Hæstarétti. Rektor átaldi vinnubrögð Hannesar en veitti honum ekki áminningu vegna málsins.