Vilja að allir nemar fái frítt í strætó

Vinstri grænir vilja að allir námsmenn fái frítt í strætó á höfuðborgarsvæðinu. Flokksráðfundur VG sem haldinn var um helgina beinir því til sveitarfélaganna á höfuðborginu að gæta jafnræðis og veita öllum námsmönnum frítt í strætó þó þeir hafi lögheimili í öðrum sveitarfélögum.

Í ályktun fundarsins segir að markmiðið með því að hafa frítt í strætó fyrir framhalds- og háskólanema sé að draga úr bílaumferð á götunum og fjölga tryggum notendum strætó.

,,Tilraunin hefur gefist afar vel nú þegar og ljóst að um farþegum hefur þegar fjölgað af þessum sökum. Jafnframt má benda á þá staðreynd að í Reykjavík eru helstu háskólar landsins og fjöldi framhaldsskóla sem nemendur sækja hvaðanæva að. Þarna er um höfuðborgarhlutverk Reykjavíkur að ræða sem henni ber að rækja af myndarskap gagnvart öllum íbúum landsins," segir í ályktuninni.