Í góðu lagi með lifrina

„Hún er bara aldeilis ljómandi, en ég get náttúrulega bara talað fyrir mig," segir Ævar Örn Jósepsson, rithöfundur og spyrill í spurningakeppninni Drekktu betur, aðspurður hvernig lifrin hefur það nú þegar líður að fimm ára afmæli keppninnar. „Þetta er ekki drekktu meira, þetta er drekktu betur."

Spurningakeppnin er nokkuð óvenjuleg, ekki þykir æskilegt að mæta skraufaþurr til leiks. „Keppendur sem telja sig illa svikna af sigri einhverra leiðinda nörda geta farið fram á lyfjapróf," segir Ævar, og útskýrir það óhefðbundna próf. „Ef ekki mælist áfengi í blóði keppenda hafa þeir ekki keppnisrétt."

Ævar bætir við að það þurfi ekki að vera mikið. Aðstandendur keppninnar séu umburðarlyndir, og meira að segja bláedrú fólki hafi verið leyft að taka þátt.

Keppnin verður haldin í tvöhundruð fimmtugasta og fimmta sinn á föstudaginn klukkan sex, á efri hæð Grand Rokk. Ævar segir sigurliðið fá verðlaun, en vill þó sem minnst gefa upp um hver þau eru, segist vera kominn út á hættulegt svið þar. „En þau eru í fljótandi formi."

Allar upplýsingar um keppnina má finna á heimasíðu hennar drekktubetur.is