Gillzenegger sár yfir að fá ekki að vera með

Ég er eiginlega brjálaður," segir Egill "Gillz" Einarsson, meðlimur Merzedes Club. Hann segist sár yfir því að hafa ekki verið boðið að hita upp fyrir plötusnúðinn David Guetta í Laugardalshöll í kvöld. Gus Gus hrepptu hnossið, og var ekki svo mikið sem hringt í vöðvabúntin.

,,Það hefur verið kveikt á símanum í viku. Hann hlýtur eiginlega að vera bilaður. Við erum náttúrulega hæfileikaríkasta techno popp hljómsveitin á klakanum," segir Gillz, steinhissa á því að sveitinni hafi ekki verið fundinn staður á ballinu.

Merzedes Club hefur aldrei spilað fyrir svo stóran hóp, en höllin tekur 5500 manns. Það hefur þó alltaf verið á dagskránni, og höfðu þeir Merzedes-liðar jafnvel ráðgert að fækka fötum meira en venjulega. ,,Við höfum verið að bíða eftir tækifæri til að spila berrassaðir," segir Gillz, og bætir við að slíkt myndi náttúrulega aldrei gerast nema á alvöru stað eins og í höllinni.

Gillz ætlar þrátt fyrir allt ekki að dvelja við ósættið, og fer því á tónleikana. ,,Ég verð ekki í fýlu yfir þessu. Þetta verður náttúrulega sjúkt djamm. Það er ekki oft sem stóri reimar á sig dansskóna. Vanalega er ég sexý gæjinn á barnum, en núna ætla ég að vera á dansgólfinu. Gæti jafnvel þurft að rífa mig úr að ofan."