Benítez: Of snemmt að fagna

„Ég mun ekki fagna fyrr en munurinn er orðin 20 stig," segir Rafael Benítz, knattspyrnustjóri Liverpool, sem biður stuðningsmenn félagsins um að fagna ekki of fljótt. Liverpool er átta stigum á undan erkifjendunum í Manchester United.

Benítez segir að fólk verði að gera sér grein fyrir því að liðið sé líka í baráttu við Chelsea og Arsenal. „Ef þú eyðir of miklum tíma með reiknivélina og ert að spá í hvað hin liðin eru að gera þá verðurðu bara klikkaður," segir Benítez.

Liverpool er við hlið Chelsea á toppi ensku úrvalsdeildarinnar en þeir bláu hafa betri markatölu. „Við erum að spila vel og skorum mörk en það má samt enn bæta ýmislegt," segir Benítez. Þá opinberaði hann það í dag að fyrirliðinn Steven Gerrard þyrfti á hvíld að halda enda leikjaálagið búið að vera mikið hjá honum. Benítez hyggst leita leiða til að hvíla hann í næstu leikjum.